Бастаан ватсабынан тыал урусхаллаабытын туһунан хаартыскалар кэлбиттэрэ. Онтон Эмистэн: «дьэ, ынырыктаах тыал түһэн эрэр. Ыаллар кырыысаларын шиферин көтүттэ. Туох эмит көтөн хаалар баар буоллаҕына өрө тарт,» -диэн дьоммут төлөпүөнүнэн эрийэн сэрэппиттэрэ. Ол кэмҥэ биһиэхэ туох да биллибэтэ. Киэһэ аҕыс ааһыыта үлүгэрдээх тыас-уус түспэтэ дуо? Соҕуруу дойду күүстээх тыалларын курдук иһиирэн, туох да көстүбэт буолла. Ыал дьиэтин кырыысаларын шифердэрэ тосту бардылар, сорохтору олох да туурталаан кэбистэ.
Билигин улууспутугар уот суох. Мэндидигэ, Чапчылҕаҥҥа подстанциялар суулуннулар, ону сэргэ Чапчылҕаҥҥа «Билайн» сибээс вышката эмиэ тулуйбата. Амматааҕы РЭС үлэһиттэрэ киэһэ, тыал уҕарыйаатын кытта, алдьаммыт линиялары оннугар түһэриигэ үлэлээн барбыттара. Биир кэлим экзамен буолар сирдэригэр уоту биэрэн, дизельнэй генератордар үлэлээннэр, экзамен туттарыытын хааччыйдылар. Уоту биэрии сыыйа чөлүгэр түһүө диэн уот салалтата иһитиннэрдэ.
Ааптар: Наталья Бубякина.