Кыра нэһилиэккэ 35 ыал кыттыыны ылан, таҥас-сап, туттар мал-сал аҕалбытын элбэх оҕолоох эдэр ыалларга, кырдьаҕастарга үллэрдилэр. Ордубут малы, уу суола арылыннаҕына, Хонууга социальнай көмөҕө ыытыахпыт диэн сүбэлэстилэр.
Биэс түһүмэхтээх, биэс кыттааччылаах «Кистэлэҥ күүс баар дуо?» диэн дьикти, дьиибэ күрэх буолла. Дьааһыла-саад сэбиэдиссэйэ Пелагея Слепцова Орто Дойдуга олорон ааспыт Бүөтүр Кыыстарабыс ойуун туһунан кэпсээнэ көрөөччү болҕомтотун тарта. Учуутал Айталина Соркомова быыс кэтэҕэр турар олоппоһу «С» буукубаттан саҕаланар диэбитэ болҕомтоҕо ылылынна. Бэриллибит сорудахтарга чуолкай эппиэттэри дизелист Василий Готовцев биэрбитин дьүүллүүр сүбэ биир санаанан кыайыылааҕынан ааттаата. Иккис – уус-уран тыллаах, дьааһыла-саад иитээччитэ Сардаана Аргунова буолла. Астаах, маллаах, иччитэх дьааһыктары тэйиэс туран сөптөөх эппиэти биэрэн, 9 кылаас үөрэнээччитэ Герта Градова үһүс миэстэҕэ таҕыста. Бу күрэҕи таҥха ыйыгар хайаан да хатылаарыҥ диэн көрөөччүлэр баҕа санааларын эттилэр.
Ааптар: Кылаана СЛЕПЦОВА.