Параады физическэй культура уонна спорт управлениетын салайааччы Эдуард Ефимов салайда. Нэһилиэк баһылыктара, спорт бэтэрээннэрэ, спортсменнар, спорт уопсастыба бэрэстэбиитэллэрэ сэлэлии хаамтылар. Оонньуу былааҕын Дмитрий Никифоров (волейбол), Туяра Емельянова (волейбол), Анастасия Кочаткина (остуол тиэньиһэ), Андрей Федотов (дуобат), Павел Яковлев (саахымат), Никита Лобанов (олорон эрэ волейбол) таһаардылар.
СӨ физическэй культура уонна маассабай спорт управлениетын салайааччы Николай Цыпандин Аммаҕа элбэх үлэ барбытын бэлиэтээтэ, Амма дьоно-сэргэтэ көхтөөхтөрүн хайҕаата уонна кэлбит дьон ыытыллыбыт оонньууттан дуоһуйан баралларын курдук олохтоохтор дьаһаналларыгар санаатын эттэ. Сатаҕай оскуолатын дириэктэрэ Егор Шишигин уонна Болугур оскуолатын дириэктэрэ Александр Михайлов Амма нэһилиэгэр буолар субуотунньукка хаһан баҕарар кыттыһарга бэлэмнэрин астына истибитин аҕынна.
Тэрийэр хамыыһыйа сабаҕалыырынан, спортсменнардыын, тириэньэрдэрдиин уонна судьуйалары холбоон 5500 кыттааччы кэлиэхтээх. Ону сэргэ көрөөччүлэр быһа барыллаан эмиэ 10000 киһи кэлэрэ сабаҕаланар.
Амманы тупсарыыга улахан үлэ эрэйиллэр.
Улуус баһылыга Николай Архипов Амма дьоно өссө түмсэн, оонньууну ыытыыга сүүс бырыһыан бэлэм буоларын хааччыйарга, Ил Түмэн дьокутаата Алексей Филиппов маннык хабааннаах сүдү тэрээһин манна 1987 сыллаахха Манчаары оонньуутун кэмигэр буолбутун санатта уонна субуотунньук күүһүнэн дьиэлэри-уоттары, уулуссалары тупсарыыга күүскэ ылсарга ыҥырда.
Ааптар: Олег Егоров